Plantun de Prouvènço

Pèr coumpara dos planto d'encò nostre

Pyrus spinosa & Panicum barbipulvinatum

Perié-bouscas

Pyrus spinosa

Rosaceae

Àutri noum : Perussié, Perussias, Perierado, Perarado, Pruchié.

Nom en français : Poirier à feuilles d'amandier.

Descripcioun :
Lou perié-bouscas o perussié trachis dins li relarg caud e secarous coume li roucaio e la garrigo. Se destrìo de soun cousin lou pirastre, Pyrus communis subsp. pyraster emé si fueio longo e gaire larjo (L/l > 2), que dounon d'èr à li de l'amelié ; mèfi pamens que i'a dos meno de fueio. Soun souvènt pelouso dessouto quand soun jouino. Pamens lou pecoui de la fueio èi mai court que lou limbe de la fueio eici. Sèmblo èstre lou soulet perié naturau de Prouvènço.

Usanço :
Li fru, apela prus bouscas, soun talamen acre e dur qu'es impoussible de li manja. Li fau acampa blet e li faire couire pèr la counfituro. Li fueio soun diuretico (caupon d'arbutoside).

Port : Aubret
Taio : 0,5 à 6 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Pyrus
Famiho : Rosaceae

Ordre : Rosales

Coulour de la flour : Blanco
Petalo : 5
Ø (o loungour) flour : 2 cm
Flourido : Printèms

Sòu : Ca
Autour basso e auto : 0 à 1200 m
Aparado : Noun
Mars à mai

Liò : Garrigo - Roucaio - Bartas - Ourle de bos
Estànci : Mesoumediterran à Mountagnard
Couroulougi : Estenoumediterrano-Nord
Ref. sc. : Pyrus spinosa Forssk., 1775 (= Pyrus amygdaliformis Vill., 1807 )

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.